1 қыркүйек

Қайырлы күн, сүйікті шәкірттер, құрметті ұстаздар, қадірлі қонақтар!
Бүгін еліміздің түкпір-түкпірінде 1 қыркүйек - Білім күніне арналған салтанатты мереке қызу өтуде. Себебі үш ай жазғы демалыстан білімге құштар әр шәкірт қуанышпен алтын ұя мектебіне оралса, 1- сыныпқа келген балдырғандарымыз енді ғана мектеп табалдырығын аттап отыр.
Елбасымыз Н.Ә. Назарбаев «Жастар – Қазақстанның кемел келешегінің келбеті, жарқын болашағының иесі»,- деп бекерге айтқан жоқ. Сондықтан әр шәкіртімізді білімнің шыңына шығатын жолы сара, ақылы дана алғыр бала болады деп сенеміз.
Ал ұстаздар қауымына мына нәрсені қаперлеріңізде ұстауды сұранамын. Ислам дінінің қасиетті кітабында «Мұғалім – мәңгі нұрдың қызметшісі, ол барша жанның жүрегіне білімнің дәнін сеуіп, жанына нұр құятын тынымсыз алаулаған жалын иесі», - деп ұстаздарды ерекше бағалапты. Осы ұлағатты атқа барынша лайық болайық, аяулы әріптестер! Адал еңбегіміздің жемісі – шәкірттеріміздің жеңісі көп болсын.
Қадірлі қонақтар, ардагер ұстаздар, Сіздерге дендеріңізге саулық, отбасыларыңызға амандық тілеп, қажымай жүре беріңіздер дегім келеді..
Сондай-ақ, бұл мереке – өткенге есеп беріп, болашаққа бағам жасайтын үлкен мереке. Олай болса , 2014-2015 оқу жылында «Тұран» мектеп-гимназиясында атқарылған игі істер мен жақсы жаңалықтарымызбен баршаларыңызды таныстырып өтейін. Биылғы 2015-2016 оқу жылында толағай табыстарға бәріміз бірге жетейік. Мереке тағы да құтты болсын.